D› Spatze Rosa und Leo kreised über Buchs

Buchs hesch no alli Tasse im Schrank?
s’Theater goht wiiter …

Näb’em Gmeindhuus – sind uf’ere Platane obe,
d’Rosa und de Leo – zwee Spatze zuegfloge.

Ganz versteckt – sie wänd sich nid loh gseh,
wäge dem Debackel – wo chürzlich isch gscheh.

Leo pfiift d’Rosa – s’Theater goht wiiter,
wärde die z’Buchs – überhaupt nie gschiiter.

De neu Gmeindsaalverwalter – het überreagiert,
uf’em «Mondlandschaftsplatz» – wird nid plakatiert.
Do findet Kultur statt – mer dörf Auto abstelle,
es cha aber nid Jede – cho und welle,

de Platz zwäckentfrömde – au nid für d’Wahle,
schriibt de «Betriebsleiter» – und nüüt zahle!

Em SVP-Ortspräsidänt – isch das i d’Nase gstoche,
die Glägeheit – do liit nochli Fleisch am Chnoche.

Uf Facebook – schriibt’er e Story – nei e Schwank,
Buchs – hesch du no alli Tasse im Schrank?

De Gmeindroot – hett sofort die Wooge glättet,
de «Hasi und Xaki» beruehiget – de Friede grettet.

Du Rosa – ei Gmeindroot/in – isch do «Befange»,
und isch a dere Sitzig – zum Zimmer us gange.

Schäm di Leo – ich vertoue dem Root,
wenn sie au noni wüsse – wie’s wiiter goht.

Mein’sch wäg de Wahle – das klappet nie,
die beide Rööt – wärde e Schueh voll use zieh.

Was ich dir jetz verzelle – weiss’i us sichere Quelle!

Jede Mäendig und Friitig – hocket e «Bruederschaft»,
i de Burestube – i de Gartewirtschaft.

Uf’em Lindebaum obe – in aller Rueh,
los ich dere vielsiitige – Gschsprööchsrundi zue.

Sie diskutiere – über Gott und d’Wält,
Klimaerwärmig – Frauegschichte – Buchs ohni Gäld.

Wöschwiiber rüeft d’Rosa – gib’s doch zue,
loh mich – mit dene «Stammtischbrüeder» in Rueh.

Nä nei – de Schorsch, de Gusti, de René, de Peter,
händ ghöört – nach’em neuschte Wahlbarometer,

sig de Investorewettbewärb – so säge d’Lüüt,
viel z’tüür – und wäge dem für Nüüt,

d’Schuelcontainer – uf de Gysimatte,
spränge im Bütschee – eidüütig d’Mässlatte.

Giizchraage – du wotsch immer nur uswiiche,
ab 2044 – wänd’sie jo s’Bütschee usgliiche.

Im «Ärnscht» Rosa – du liebe Schatz,
denn bin ich – en uuralte Buchser Spatz.

Leo, de Gmeindroots Rücktritt – nimmt mi richtig mit.

Die 845 wo’ne gwählt händ – sind bi ihm tätowiert,
fühle sich nümme verträtte – sind total fruschtriert.

Rosa – het er ächt Alli – nei das wär übertriebe,
mit’em ganze Name – uf sin Underarm gschriebe?

Denn isch uf de Platana wieder Rueh,
sie flüüge friedlich zäme – is Büehl ue.

Ps: I mues iigeschtoh – trotz sim Schaarm,
mi Name – de stoht nid uf sim Arm.

D› Spatzen Rosa und Leo us Buchs